Bu gün UEFA Çempionlar Liqasında qrup mərhələsinin ilk oyunları keçiriləcək.
4 qrupda ümumən 8 matç olacaq. Görüşlərdən ikisi 20:45-də, digər 6-sı 23-də başlanacaq. Futbolsevərlərin əsas diqqəti isə İspaniyaya yönələcək. Barselona şəhərinin eyniadlı komandası “Kamp Nou”da “Bavariya”nı qəbul edəcək. UEFA Çempionlar Liqasında “Barselona” və “Bavariya” arasında keçirilən oyunlar klassikaya çevrilib desək, yanılmarıq. Tarixi görüşlərdən biri - 2 mövsüm əvvəl ən mötəbər klub turnirinin 1/4 finalına təsadüf etmişdi. “Bavariya” karantin qaydalarına görə Lissabonda təşkil olunan matçda rəqibi ağır məğlubiyyətə uğratmışdı - 8:2. Xatırladaq ki, UEFA o vaxt pandemiya şəraitini nəzərə alaraq pley-of mərhələlərinin 1 görüşdən ibarət olması ilə bağlı qərar vermişdi. “Bavariya” isə həmin mövsüm sonadək uğurla irəliləyib finalda “Pari Sen-Jermen”ə minimal hesabla qalib gələrək çempionluq sevinci yaşamışdı. Lakin həmin vaxtdan bir çox dəyişiklik baş verib. “Barselona”ya Kike Setyen deyil, Ronald Kuman rəhbərlik edir. “Bavariya”da isə Hans Diter Flikin yerinə Yulian Nagelsman komandanın “sükanı arxası”na keçib.
Elə Kataloniya klubunun baş məşqçisi Ronald Kuman da mətbuat konfransında bu barədə danışıb: “İllər ötür, hər şey dəyişir. “Barselona” klubu yenilənir. Biz hələ də optimal formada deyilik. Avropanın ən güclü komandalarından birinə qarşı mübarizə aparacağıq. Belə görüşlərdə doğma meydan amili böyük rol oynayır. Məhz bu üstünlükdən lazımınca yararlanmalıyıq. UEFA Çempionlar Liqasında titul uğrunda yarışırıq. Asan olmayacaq. Lakin biz mötəbər yarışa uğurla start vermək üçün əlimizdən gələni edəcəyik”.
Yulian Nagelsman isə “Bavariya”nın favorit hesab olunmasından narazılığını dilə gətirib: “Deyəsən mətbuat kimə qarşı, harada oynayacağımızdan xəbərsizdir. Meydandan kənarda iddialı danışmaq üçün əsas görmürəm. Gücümüzü sözdə deyil, meydanda göstərməliyik. Dünya səviyyəli 2 komanda üz-üzə gələcək. Hazırlıqdan danışırıqsa, futbolçular qarşılaşmaya necə lazımdır nizamlanıblar. Həmişə olduğu kimi yalnız qələbə üçün mübarizə aparacağıq”. Saat 23-də başlanan “Barselona” – “Bavariya” ingiltərəli referi Maykl Oliver idarə edəcək.